絲絲講場：王國安睇清世態炎涼
證券及期貨專業總會會長王國安，尋日終於完成絕食24小時嘅「真人騷」創舉，佢絕食嘅呢兩日，咁啱遇上天氣突然轉冷，連佢哋所搭嘅臨時帳篷都差啲畀北風吹倒。王國安回想番呢24小時，真係有血有淚！
佢話前晚喺交易廣場門外絕食時，夜晚刮起大風，仲要係北風，真係好鬼凍，佢哋冇食嘢只係靠飲水頂住，佢以一個字嚟形容﹕成晚係咁「震」，瞓又瞓唔到，坐又坐唔到。好鬼陰功喎！咁佢成晚流流長點過呀？好彩夜晚都有啲會員連同家人去探過佢，就算深夜兩點，都有會員嚟支持，更有啲會員分早、午、晚三更嚟送熱水。
佢話今次絕食，絕對感受到人情冷暖。金利豐（01031）老闆娘朱李月華親自打電話畀佢，叫佢着多件衫，因住冷親；證券學會會長李細燕、恒豐證券老闆張華峰、同李君豪都有嚟探過佢。
撕信抗議港交所
但佢炮轟港交所，除咗企業傳訊部主管羅文慧有睇過佢外，尋日成日都冇港交所職員嚟過，就算傍晚接收請願信，只係派交易科主管戴志堅嚟。王國安不滿行政總裁李小加同主席夏佳理唔親自出嚟接信，當眾撕爛封請願信。
佢聲言今日不惜將CPT（專業培訓課程）改期，發動300名會員參加今日嘅反加時大遊行，估計場面聲勢浩大；勢言要喺港交所禮拜三開董事會前施加壓力，不過，聽聞董事會暫冇諗住轉軚！
余詩韻