仍然係日做夜做冇停手！近來不斷需要用手提電話收發郵件，發現當今互聯網嘅重要性日益提升，今時今日尤其係公司高層，已經唔可以缺少咗互聯網嘅幫助，大家話係咪？開少咗個會，又或者睇漏一個資訊，隨時令公司損失幾百萬！
騰訊（00700）呢間公司相信大家都已經耳熟能詳！公司最重要係市場龐大、業務獨特，喺內地為用戶提供互聯網增值服務、移動及電訊增值服務以及網絡廣告服務。睇番互聯網嘅行業趨勢，只會繼續發展，唔會停低；首先，中國市場嘅無線互聯網市場持續迅速增長，無線互聯網用戶總數喺一○年仍然繼續高速增長，仲快過中國嘅GDP增長，總共增加29.7%，達到3.027億戶，主要係因為硬件設備日益完善，無線資料基礎設施同移動應用（如WAP門戶、即時通訊及社交遊戲）嘅迅速發展。
近年微博出現爆發性增長，已成為中國嘅主要社交媒體平台，截至去年第三季，騰訊微博註冊帳戶已超過3億。另一方面，網頁遊戲領域、網絡廣告市場亦都不斷增長，更因中國走出世界，世界盃同世博會等等大型活動帶動外國對中國資訊嘅需求，令公司喺呢幾方面大賺一筆。
無論點樣，最緊要都係數據好睇，大家話係咪？公司呢幾年來都維持住超過50%嘅盈利增長，雖然市盈率昂貴，但只係反映佢高增長嘅潛力。繼續追蹤、出發！
香港大學電子金融服務榮譽助理教授徐燦傑