絲絲講場：星展兩VP歌藝驚人
大家平時見到banker（銀行家）西裝骨骨，但當中可能隱藏唔少舞台王者。絲絲講緊嘅係星展為員工舉行才藝表演比賽，兩位星展香港副總裁（VP）嘅技驚四座，下個月將去參加總決賽。
近百同事撐場 先贏氣勢
要喺芸芸banker中脫穎而出一啲都唔簡單，優勝者之一嘅謝瑞明（Nelly）自彈自唱三首Whitney Houston嘅名曲，呢位天后啱啱逝世嘅消息轟動全球，呢個時候揀選天后名曲，充分表現咗banker審時度勢嘅能力。絲絲又發現Nelly唔單只靠歌聲攝人，佢人緣應該好好，皆因新升任零售銀行業務董事總經理嘅鍾少權，連同近百位零售銀行同事專程捧佢場，淨係氣勢已贏咗一截啦。
另一位優勝者李凱安（Andrew）亦都不遑多讓，又唱又跳表演一首拉丁美洲歌曲。絲絲記得，星展香港行政總裁龐華毅正是拉丁美洲嘅厄瓜多爾公民，相信聽到首歌都會覺得分外親切。話說回來，星展集團執行總裁高博德係印度人，唔知到決賽時，Andrew會唔會表現一曲印度歌舞呢？