市場熱線:上氣生意唔憂做

港股尋日跟住外圍下跌,暫時又係月初喺兩萬一唔上唔落格局,要有幾日時間磨爛蓆。雖然話係整固,但整固完未必一定升,主要係睇大戶心意。港股尋日成交縮到607億元,好多人同古勝一樣採取觀望態度,呢排炒股好過炒市,揀中落後股就和味。

思捷績佳鹹魚翻生

歐洲PMI數據幾差吓,但好在又係大漲小回,有好消息升多多,有壞消息跌少少。道指喺萬三點回頭是岸,但凡大關口總係有啲矜持。港股除咗睇住下禮拜一大笨象(00005)派成績表之外,另一大件事係睇第二輪長期再融資操作(LTRO)玩到幾大,傳聞1萬億歐元講到似層層,但如果少咗一截,孖屐肯定唔收貨。不過,放水放得多亦未必好,原因係養懶人,連大笨象都問歐洲央行攞低息貸款。

其實適可而止就得,依家歐豬債息已回落到正常水平,再跌嘅空間亦有限,不如留有一手,到有乜依郁先推LTRO3未遲。

恒指尋日跌168點,個別地主股發軟蹄,前日急升嘅內房股亦先高後低,最引人注目係思捷(00330)一鋪翻身,成績表好過預期好多,而且今年初歐洲天氣特別凍,下半年度成績表可能更加標青。不過,思捷前景主要係睇管理層能力,開拓中國市場亦唔係開舖咁簡單,唔少零售股喺大陸都損手爛腳。

下隻業績股最受關注嘅係大笨象,又裁員又諗住印公仔紙當花紅,其實已預示成績表唔慌好得去邊,但唔少華爾街大行早已係咁做,亦唔見得對股價有幾大影響。隻象尋日頂住70蚊關口,但喺倫敦股價先行回升。聯想(00992)跌穿7蚊關口,主要畀戴爾同惠普成績表拖累,但戴爾同惠普之失正好就係聯想之得。

碼頭股同航運股呢排回吐壓力最大,「菠蘿指數」上個月跌到四腳朝天,二月上半月輕微回升,但近期又再回軟到700點附近,最重要係睇加運費有冇咁順攤,但同航運業息息相關嘅勝獅(00716)就最勁。

講到風水輪流轉,電力設備股係最佳寫照,之前嘅龍頭大佬係東方電氣(01072),但呢排被大行唱佢收入見頂,股價同市況掉轉走;最掂嘅反而係不嬲被指不成器嘅哈爾濱電氣(01133),上海電氣(02727)走勢亦算唔錯,屬反覆上升格局。

古勝對今年復批核電項目深信不疑,但大和本月中出報告,話東氣大部分業務已屆發展成熟階段,相反上氣同哈電核電發展仲大把前途,而前景亦較為清晰。

復批核電時間問題

上氣勝在手頭定單超過2,500億人仔,用一一年預測收入去計數,即係未來三年多生意都唔使憂,就算部分印度定單可能延遲交付亦影響不大。舊年下半年幾倍PE嘅股都嫌貴,但依家十零倍PE都嫌平,上氣一二年預測PE約12倍,以一間穩定增長嘅公司來講仍算吸引,短線要睇住核電有冇進一步落實消息。

古勝

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!