一個人個名改得好唔好，真係會影響命運？絲絲對玄學一知半解，真係唔識。但滙控（00005）有幾位CEO，英文名相同，係巧合定係中咗中國人嘅傳統智慧？
滙控行政總裁歐智華，英文名係Stuart Gulliver，滙豐印度行政總裁就叫Stuart Davis，滙豐日本行政總裁個名係Stuart Milne，三位Stuart當中，梗係歐智華最高級啦！
滙控同其他跨國金融機構一樣，高層變動停不了！Stuart Davis已經坐鎮咗印度滙豐三年，有傳下個月會被調去新加坡，消息人士話係三年一次嘅「慣性」人事調動喎。Davis掌管澳洲滙豐七年後，喺○九年接掌印度滙豐，佢任期內可謂戰績輝煌，一○年令公司喺印度區嘅盈利上升82%外，同年嘅盈利仲係印度滙豐145年之冠。世事真係巧合，代替Stuart Davis嗰位高層，就係滙豐日本行政總裁Stuart Milne。