「以訛傳訛」可以係一樣好恐怖嘅事，隨時傳到面目全非。但如果傳畀平保（02318）集團總經理任匯川（Alex）就安全好多，因為佢太好記性，絲絲已經用實驗認證了。
Alex自從升職坐正後，唔知係咪太忙，少見咗香港嘅老友記，趁住仲係正月，約埋聚一聚，一見到絲絲就講「恭喜發財」，咿，廣東話好咗好多噃。
一班老友大玩「以訛傳訛」遊戲，Alex係第一棒，望住張答案紙一分鐘內，就將答案背得滾瓜爛熟，一棒傳一棒，傳到最後第五棒都無走樣，結果成為大贏家。如果唔係佢好記性，兼廣東話大躍進，點會贏到呀！
絲絲仲聽聞，Alex玩得之外仲好唱得o架。Alex係平保第二把交椅，一○年時連升兩級，先接替梁家駒升任副總經理兼首席保險業務執行官，再接替張子欣成為集團總經理，升職好似火箭咁快，平保人士都稱其為任少帥。
Alex日理萬機，成日都要周圍飛，單係北京一年都飛成廿次，上海飛十五次，香港至少一個月一次，佢話一放假就要過「普通人」生活，即係陪吓家中千金同埋打高爾夫球咁話。