絲絲講場：羅奇收山返耶魯教書

羅奇係大摩嘅代表人物，歷年都唱好中國，睇淡全球經濟。佢八二年加入大摩，一直升至大摩亞洲區嘅主席兼首席經濟師，喺一○年至轉做亞洲區非執行主席，直至尋日，先至話正式退休。但原來佢並非就咁唔做嘢長歎，而係佢想留喺耶魯大學度做全職教師先生（未退休前已兼職教書），繼續作育英才。

香港人對羅奇都好熟悉，皆因佢經常穿梭中港兩地了解實況，發表中國經濟嘅獨特意見，佢一向睇好中國經濟，好似近期佢預計中國經濟唔會出現硬着陸，又反對美國強迫人民幣大幅升值。據大摩行政總裁James Gorman話，羅奇仲計劃寫一本關於中美經濟關係緊張嘅書添。

馬勤轉工 長駐香港

另一位出現變動嘅係馬勤，佢會加入加拿大退休金計劃投資局亞洲總裁，日後將會長駐香港，協助集團行政總裁David Denison擴充新興市場嘅業務。

講起呢位賓卡，佢舊年底先至退任高盛亞太區（除日本外）嘅副董事長，來頭唔細，喺佢任內，高盛完成咗好多大嘅新股上市，好似中石油（00857）、地鐵（00066）同埋平保（02318）等等。