依家「i」產品成行成市、政府又提倡電子學習，但渣打銀行（香港）認股證銷售董事翁世權（Simon）反而希望囝囝「實實在在」咁拎起書本，去培養讀書興趣。
原來佢嘅乖仔Trevor，人仔細細，已經有幾百本圖書，而且種類仲好多元化添，認字、繪本、人物、故事等包羅萬有，屋企可謂已變咗一個小型圖書館。就算早前有朋友建議佢買部iPad畀囝囝，佢都耍手擰頭，堅持用實物。
Simon同絲絲解釋：「你話我老土都好，我認為一開始就用iPad嘅小朋友，之後就唔會再拎起書本；反而從小就揭書嘅，大個咗之後自然識得用iPad，所以我哋由Trevor開始學爬，已經不斷買書畀佢，依家佢嘅書有成幾百本。」
唔單只買完本書畀阿仔就算數，仲有「後期」工夫o架！Simon仲教路，擺放書本嘅時候，要畀小朋友睇到封面上嘅圖像，咁樣先吸引佢哋睇書，如果淨係將個書脊擺出嚟，就吸引唔到小朋友嘅眼球。講落，Simon屋企呢個小型圖書館，又幾與眾不同喎。
余絲韻