近幾年按揭市場隨住樓市起起落落，絲絲識嘅銀行按揭部主管都玩音樂椅咁氹氹轉，聽聞中銀香港（02388）懸空已久嘅按揭業務主管之位，終於喺舊年十二月由伍愛施接手。
其實，中銀香港上一任按揭業務主管林甘雨走咗之後，銀行界一直都期待邊個會接佢個位，話晒中銀香港都係按揭市場龍頭之一，點知一等就年幾，而伍小姐上場之後，中銀香港近期按揭業務攻勢明顯更加有組織，連續3個月市佔率拎第一。
絲絲發覺每逢有新人上場，間行都會積極啲，好似恒生分行網絡及抵押貸款業務主管譚麗琼（Peggy）咁，睇埋分行之後，忙咗好多，依家多咗一位抵押貸款業務主管爾宗祺（Johnson）幫佢手，過年之後佢哋推新服務，亦乘機出嚟同大家見個面。
大新銀行（02356）零售銀行處產品及市務部主管陳碧蓮（Florence）上場之後，過完年仲即刻減按息，睇嚟今年按揭市場仍然會非常精彩。
余絲韻