絲絲講場:EGM花過百萬 會公都問有冇價值

大家仲記唔記得舊年尾,一班會計界改革派要求一人一票選會計師公會(下稱會公)會長(依家係由理事會選出來),會公因此要召開EGM表決呢個議案。

近日會公行政總裁張智媛出咗封信畀會員,交代番當日嘅詳細情況,絲絲發現當日EGM只開咗一個鐘頭二十分鐘,但就使咗公會106萬元!即係話,每分鐘要使成1.3萬元!

「改革派」缺席冇得辯論

最諷刺嘅仲要係,提出呢個議案嘅人士當日大部分都no show(冇出現),整個EGM竟然冇人就支持議案發言,但會公就「大嗱嗱」使咗過百萬元!呢啲唔係叫「勞民傷財」,仲可以用甚麼形容詞?絲絲心諗,會計師唔係一向都好注重成本效益㗎咩?

張智媛喺封信度都話,預咗喺EGM上,可以同提出者進行討論,結果佢哋缺席,唔能夠聽到佢哋嘅意見。至於會公使咗成百萬元,佢就話應由會員評價以EGM形式進行類似議題,係咪使得有價值?

淨計郵費都16萬

睇番嗰100萬點使?主要係法律方面嘅開支,要成43萬元;EGM通知、授權書等要成19萬;郵費16萬;點算投票費用10萬;網上廣播設備8.6萬元等。

最後議案以964票贊成,1,250票反對,唔獲通過。絲絲就大惑不解,雖然明知勝算有限,但主張改革向來都唔會放過任何辯論嘅機會,當日集體no show,唔通仲有其他目的?

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!