絲絲講場：金融界歌王「安哥」賀壽
有金融界歌王之稱嘅資深經紀張天生，繼五年前70歲大壽時，返鄉下順德搞個人演唱會賀壽後。佢老人家計劃，喺今年底75歲生日時「安哥」（ENCORE），再開演唱會慶祝生日。
生哥一向人緣好，相識滿天下，相信一大班金融界朋友知道呢個消息後，肯定到時會拉大隊返去聽佢嘅演唱會，當然仲要指定聽佢嘅首本名曲，葉振棠嘅《忘盡心中情》喇！
其實○七嗰次演唱會真係好好玩，生哥邀請咗金融界過百人返上去聽，足足要四架旅遊大巴至載得晒，筵開14席，大家玩到樂而忘返。當時已經有金融界朋友建議佢不如每年生日都開一次演唱會，但張天生覺得太密喇，當時佢已話如果再開，就考慮到75歲生日時至開喇。
張天生拉隊遊順德
眨吓眼五年話咁快又到，今年十二月張天生就75歲生日，佢已經開始諗定演唱會，仲話安排朋友坐車、坐位等，唔假手於人，唔怪得個個都玩得開心。除咗聽歌外，返到生哥鄉下順德，佢自然亦會帶朋友品嘗一吓當地各種特色美食，大家肯定滿載而歸啦。
講開食飯，下個月港股加時，飯鐘少咗半粒鐘，生哥慨嘆到時真係少咗好多人生樂趣，食飯趕頭趕命。仲話第日經紀約絲絲食飯，都可能要改周六喇！
余詩韻