唔知係咪命格使然，周鴻禕嘅奇虎360似乎係最「惹火」嘅內地IT企業，奇虎嘅七款手機app，昨日就突然喺iPhone嘅App Store下架。據奇虎解釋今次事件，係由於蘋果公司發現有關產品嘅評價出現異常，又聲稱有對手喺未搞清楚真相前，就喺網上散布「360被蘋果封殺」嘅不實消息，更表明會對相關人事作出控告！
據奇虎目前嘅說法，同蘋果公司溝通後，相關嘅七款App將會短時間內重新喺App Store上架。今次事件係由於蘋果公司發現，呢七款手機App嘅產品評價，均由同一帳號提交而且數據異常，所以依慣例下架進行調查，消息亦令到奇虎喺美國嘅股價，借故下跌逾6%。
奇虎尋日未具體交代產品評價數據異常嘅詳情，但事件會否再次引發奇虎同對手嘅口水戰，睇怕又會成為內地IT界嘅話題！奇虎以前都試過同「行家」口水戰，以指摘騰訊嘅QQ軟件存私隱風險一役最經典，最終騰訊勝訴。
余絲韻