樓價咁貴，相信好多人都會認為賣樓嘅一定好好搵先係。不過早兩日絲絲就發現有張標明「綠城中國項目成本和利潤構成」嘅分析圖，喺微博上面流傳。
圖中所見，綠城兩萬人仔一平方米嘅單位，扣除咗一堆開支之後，原來只係賺得二千三百三十九蚊人仔，即係相等於十二個巴仙。有網民就話，如果係真，咁賣生果睇嚟都好搵過賣樓喇！
呢張圖由一個註冊名為「多德」嘅用戶上載，上載咗無幾耐，SOHO中國董事長潘石屹就馬上轉發呢條微博，仲話「終於有人把這張餅給畫出來了」，似乎好認同發展商利錢少，吸引咗更加多人轉發條微博。圖上面顯示，單係每平方米嘅建築成本就佔三成九，達到七千八百零一蚊人仔，另外，土地費用亦都佔兩成二，但有網民就質疑，個建築成本實在係太高，話建築成本應該只係二千五百至三千蚊人仔就合理啲。
不過對於呢啲數字，綠城嘅相關人士就澄清話，張圖唔係佢哋內部流出，公司依家並無測算同繪製過咁詳細嘅圖，又認為之前對外公布嘅數字，應該唔可以推算到呢啲內容，所以數據來源可能有問題喎！
余絲韻