絲絲講場：利是封循環再用 雅居樂夠環保
相信大家新年都收到唔少利是，之不過，有無諗過拆咗嘅利是封可以第二年再用番呢？雅居樂（03383）舊年就第一次參加環保團體「綠領行動」，喺佢哋香港展銷廳，同埋內地多個樓盤回收利是封。據雅居樂副總經理兼公司秘書衛靜心（Peggie）話，舊年反應相當理想，所以公司繼續參加。絲絲尋日見到Peggie自己都身體力行支持環保，用回收返嚟嘅利是封派利是。
巧妙設計 年年啱用
Peggie話，考慮到利是封可以回收再用，喺今年雅居樂利是封嘅設計上面佢哋都花咗心思，除咗利是封嘅封口位唔可以用黏貼之外，上面所印嘅圖案亦唔可以用有代表生肖嘅龍或者年份，所以就同舊年一樣，揀咗用如意結印上去。不過Peggie話，佢哋都有喺如意結上面做咗改動，唔使同舊年一樣，果然係有心思！
不過絲絲就發現，喺「綠領行動」回收返嚟嘅利是封，後面都會印有「多謝你支持利是封重用行動──綠領行動2012」。絲絲認為，如果可以嘅，下次可以學吓雅居樂咁，避免印上呢啲有時間性嘅字眼就更加perfect喇！
余絲韻