中國燃氣（00384）畀中石化（00386）同新奧能源（02688）「提親」，唔好以為淨係股東係利益攸關，所以至咁肉緊，查實一班員工都好關注，仲搞埋簽名上書，希望公司「拒婚」。
「提親」事件已發生咗成個半月，最利益攸關嘅梗係班股東啦，所以近期嘅焦點，都擺咗喺股東嘅股份買入賣出情況，好似韓國SK E&S，同埋英國上市嘅富地石油成日增持，呢啲行動就當係股東對這宗提親反應嘅啟示。
中國燃氣尋日出咗份通告，話董事會收到兩封信，有成4,000個員工嘅簽名，話係表達對呢單收購對公司業務同埋行業嘅競爭發展嘅潛在不利影響嘅憂慮，呢句句子咁長。簡單嚟講，就係話班員工想公司拒婚喎！
絲絲睇番中國燃氣嘅年報話公司舊年九月底有成二萬個員工，攞4,000個員工除一除，即係話有五分之一員工簽名反對單刁，比例嘅嘢睇官自己判斷喇。不過企業易手呢樣嘢，喺資本市場都唔算罕見，計絲絲話，打工嘅最緊要勤勤力力，就係對公司嘅最大支持喇。
余絲韻