社交網站一哥facebook（fb）即將以科企巨無霸嘅姿態喺美國掛牌，成為全球熱話。出名乜都賭一餐嘅愛爾蘭博彩公司Paddy Power，自然唔會放過開出fb盤口嘅機會啦！今次賭乜？咪就係估創辦人朱克伯格會唔會出席上市儀式，敲埋開市鐘，目前賠率係100賠1，即係話佢現身上市儀式嘅機會極高。
唔想賭呢樣，不如賭吓fb招股價，如果賭個價介乎35至44.99美元，賠率係11賠10，睇落冇咁刺激喎，咁不如先去買影子股，回報更快更好，好似社交網絡遊戲開發商Zynga，同埋專業人士社交網站LinkedIn嘅股價，喺fb帶挈下禮拜四一度勁升21%及7%。
不過，fb嘅名氣卻畀啲不法之徒利用，欺詐無知嘅粉絲！話說上年，美國威斯康辛州有位46歲嘅太太，周圍同人講話佢個女識得朱克伯格，仲攞到價值100萬美元嘅fb股份，結果呃咗幾十人落疊買佢個女啲「假股」。
受害人之一係阿太嘅裝修工人，佢收咗1.4萬美元嘅「假股」代替人工，後嚟發現呢位阿太用假名，交易文件又有可疑，決定將佢送官究治，依家阿太被落案控告31項包括盜竊、偽造及提供誤導性陳述嘅罪名。
隨住fb上市盛事將至，即將一夜暴富嘅fb小股東亦陸續浮面，為fb首棟總部大樓作壁畫嘅藝術家崔大衞（David Choe），7年前作出明智決定，接受股票代替創作費。據悉fb創辦之初，顧問以股代酬一般可以攞到0.1到0.25%嘅股份，若然崔大衞仲未套現，呢筆「創作費」將升值至兩億美元。
余絲韻