絲絲講場:蘇皇舵手跪低百萬鎊化水

上個禮拜五,蘇格蘭皇家銀行(RBS)阿頭赫斯特獲發上年花紅接近100萬英鎊,慘遭全城圍插,要佢嘔番啲花紅出嚟,結果赫斯特向公眾屈服,喺啱啱個禮拜日晚話唔敢要啲花紅。較早前蘇皇主席漢普頓都話放棄,寧願𢭃少啲,好過犯眾憎。

赫斯特焗住唔要96.3萬英鎊花紅,近排罵聲四起班英國高官即刻笑晒,齊聲叫好,財相歐思邦讚揚赫斯特作出合理同令人滿意嘅決定,提醒佢唔好辜負當日畀錢救銀行嘅納稅人對佢嘅期望。亦有前高官話赫斯特呢個決定,遲到好過冇到。不過,唔要花紅贏番幾多掌聲都好,睇嚟都彌補唔到赫斯特見財化水嘅傷痛喇!

其實宣布唔要上年花紅嘅舵手,當然唔只赫斯特,同樣畀英國政府國有化嘅萊斯銀行,阿頭奧爾塔──奧索里奧都話放棄花紅,唔知遲啲政府會唔會管埋其他公司啲花紅,搞到英國唔少CEO攞花紅都攞得唔安樂呢。

花旗帕森斯傳功成身退

另外有消息話,花旗集團主席帕森斯將會喺三月頭決定辭職。帕森斯喺○九年臨危受命,幫花旗喺金融海嘯後進行業務上嘅「災後重建」,依家唔使再蝕錢之餘,上年盈利仲有增長,帕森斯可以話功成身退。

余絲韻

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!