絲絲講場：花旗林鈺華帶埋財神開工
「開工大吉」個個都想，花旗香港都好識做，環球個人銀行服務副總經理林鈺華（Christine）喺啟市之日，去分行拜年兼派利是，即令到士氣高漲。
尋日絲絲朝早經過花旗香港旺角旗艦店，見到Christine同財神齊齊落旺角分行派利是。花旗香港間旺角分行有成四層咁大，個個部門都集齊人馬接財神，Christine亦同佢哋拜年打氣、迎春接福，聽講單計旺角旗艦店，Christine已經派咗超過200幾封利是啦。
財神再返總部「洗樓」
絲絲聽花旗香港嘅朋友講，原來財神去完旺角分行之後仲過埋太古坊總部「洗樓」，話晒管理層都係坐喺總部，當然要整旺個場。聽講財神非常好心機咁洗足8層樓，再派多2,000幾封大利是，認真大手筆，皆大歡喜。
一般嚟講，華資行比較着重農曆新年，氣氛好好，依家見到外資行都咁融入本土文化，仲特登請埋財神整旺個場，確係皆大歡喜。