絲絲講場：恒生「五高層」拜早年
臨近農曆新年長假，恒生銀行（00011）有個傳統，就係最高級管理層會同大家拜定早年。今年就由「五巨頭」出場，除咗恒生副董事長兼行政總裁梁高美懿（Margaret）同埋恒生中國副董事長兼行政總裁薛關燕萍之外，絲絲發覺另外三位男士管理層都用新名銜同大家拜年。
「新官」林燕勝登場
絲絲第一眼就認出企業及商業銀行業務總監林燕勝（Donald），因為佢舊年榮升，睇晒企業同商業銀行，係拜年相入面首次粉墨登場，而調任零售銀行及財富管理業務主管陳力生（Nixon）亦以新名銜見大家，當然唔少得新入局嘅執董馮孝忠（Andrew）啦。
巨氈紀念悠久歷史
絲絲記得，往年恒生嘅高層，都會喺唔同分行門口同大家影相拜年，但係今年一於搞搞新意思，首度「回歸」總行博愛堂，喺紀錄恒生歷史嘅巨型掛氈前面影。
絲絲記得呢條掛氈成15平方米大，逐針逐線製作，上面記載咗恒生78年演變史，上年中開始掛喺博愛堂。
余絲韻