市場熱線:達芙妮汰弱留強

恒指尋日跌接近200點,但頂住萬九點收市,花旗尋晚冇市,睇住美股期指下跌同歐元創16個月新低自己嚇自己,但歐洲魚缸開波仍然微升。亞洲魚缸尋日全部一齊跌,港股跌1%同其他孖屐差唔多,不過跌市成交縮到389億元顯示沽壓唔大,後市仍有希望衝高位。

標普驚歐豬翻身立即伸多腳,EFSF評級睇怕亦都凶多吉少,但向好嘅方面想,法蘭西成日驚被降級,依家反而消除咗不明朗因素,即係所謂「驚被打」大過「被打」嘅痛苦。今日祖國會公布GDP,但唔會有太大重要性,GDP好唔好已成過去,最緊要係今年能否保八。

盈利預告驚多喜少

滬綜指再跌到2,200點邊,中小板指數同創業板都受重創,同上周五情況差唔多,唯一逆市上揚嘅係福建股,港股亦有廈門港(03378)做好,至於一眾台商股已扎根多年,無論「藍天」抑或「綠地」其實冇乜分別。不過,台股尋日先升後跌,炒消息只係好短癮。

呢排香港好多公司發警報,但A股就報喜多過報憂,據統計暫時預告有增長嘅公司佔超過7成。不過,全年有增長未必值得慶祝,仲要攞第四季同第三季比。尋日又有多間公司發盈警,淨得東岳(00189)同亞泥(00743)話盈利將大升,但東岳一一年淨計上半年已差唔多多過一○年全年成倍,所以實際有幾「喜」要睇埋成績表至知。

跌市仍有唔少奇葩,中交建(01800)、中聯重科(01157)同比亞迪(01211)都係6連升,比亞迪踏入一二年龍精虎猛,「瑞士佬」上個禮拜發報告,話佢舊年S6新車大賣,成為舊年第二最好賣嘅SUV型汽車,而管理層誇口話今年S6同G6會分別賣到12萬同6萬輛。不過,「瑞士佬」仍係叫人沽比亞迪,目標價得15蚊。

電訊同電訊設備股再度重創,「衰股」今年先後翻生,但舊年強勢嘅電訊股同零售股則要捱沽,零售龍頭股百麗(01880)再跌2.5%,「高佬盛」、麥佬同德國佬都覺得公司銷售減少係「外部因素」,包括天氣較暖、消費欲降低同宣傳減少。不過,古勝覺得百麗開店太過進取,一○年尾鞋類店得7,500間,但到一一年尾已增至過萬間,一條街開三幾間分店自然會分薄,體育用品股嘅教訓應該好清楚。

整固後續看高一線

同係賣鞋,點解達芙妮(00210)反而第四季同店銷售增長竟然達26%?兩間公司嘅最大分別係百麗賣嘅鞋高檔啲,如果消費者縮皮可能會轉幫襯「鞋櫃」;而且天氣暖令長靴滯銷,但其他鞋類銷情可能增多。不過,女人一年買十對八對鞋閒閒哋,如果經濟轉差,買少兩三對嘅話,對鞋股咪話唔大鑊。

如果百麗有春江鴨預早沽貨嘅話,達芙妮亦有春江鴨喺舊年第四季不斷買貨。事實上,鞋店好多係百貨公司專櫃,收入要同百貨公司分帳,所以百貨公司對銷情最一清二楚。達芙妮舊年同店銷售增長好反覆,四季分別係1%、32%、23%同26%,睇舊年股價,同呢4組數字走勢相當一致。

既然達芙妮嘅經營情況喺股價先有啟示,所以強勢要追、弱勢要沽,搭吓順風車無妨。隻股上月初升到9.5元,喺回過氣之後,有機會重展升浪。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

古勝