加薪係獎勵員工最直接嘅方法，有啲公司仲會加埋其他獎勵添，好似葉氏化工（00408）咁。只要銷售達標，就會同成班前線銷售員去旅行，唔係廣東、華東三日遊咁寒酸，係由員工揀目的地㗎！
絲絲聽到葉氏化工副主席葉子軒咁講，忍唔住面露羨慕眼光。葉生以往主要喺前線打拚傾生意，最明白前線人員嘅辛勞。
呢個咁筍嘅獎勵，已經搞咗好多年，當年葉氏生意仲係好細嘅時候，葉生為咗激勵員工，如果每年嘅溶劑銷量按年增加10萬噸，就請晒全部前線銷售員工去旅行，去邊任佢哋揀，仲要係公司額外畀假，一去就十幾日。
點不知咁多年嚟佢哋嘅銷售屢創佳績，所以已經請過好多次，歐美好多地方都去過晒，而舊年亦都達標，所以又有得去，目的地就係澳洲。
葉生除咗對員工疏爽之外，做生意時有需要都唔會慳，有一年適逢農曆新年間有批貨要送，但係搵唔到司機，結果出到四倍人工同包兩晚去天津嘅機票食宿，「利誘」司機送呢批貨，結果梗係成功啦。
余絲韻