絲絲講場：梁穩根 最多人「關注」
內地有個網站，每年都會搞一個叫「中國財經風雲榜」嘅評選，舊年搞到第九年，結果啱啱喺前日公布咗，其中一個較受矚目嘅獎項就係「最受關注上市公司掌門人」，話明「最受關注」，所以頭幾位嘅老總都係一啲大家非常熟悉嘅人物嚟嘅。
「打工皇帝」馬明哲奪亞
排頭位嘅就係三一重工董事長梁穩根，梁總舊年非常架勢，舊年五月，佢以500億人仔身家成為《新財富》雜誌公布嘅富人榜首位，成為呢個榜第一個由A股製造，同嚟自內陸省份嘅首富；去到九月，佢再成為「胡潤百富榜」第一位，身家按年升咗成89%，去到700億人仔。
第二位就係中國平安（02318）董事長馬明哲，馬總舊年雖然做唔到首富，但就做咗「打工皇帝」。喺《福布斯》雜誌公布嘅內地上市公司CEO薪酬榜入面拎咗第一，年薪有成987萬人仔。
之後嘅幾位都有大家熟悉嘅人物，第四位就係比亞迪（01211）主席王傳福，第五就係舊年由中海油（00883）跳槽去中石化（00386）做董事長嘅傅成玉。