市場熱線：國航係時候起飛

尋日個市冇乜波幅，但成交金額仍維持562億元已經算係唔錯，祖國公布十二月CPI升4.1%，同原先預計嘅4%差別唔大，挾升可能覺得PPI升得1.7%，預示通脹會進一步下降，甚至有話今年首季PPI會轉負數。朝早挾升有引人落疊味道，但呢排成交升相信並非散戶所為，應係芬佬嘅「羊群效應」。

物極必反衰股翻生

呢輪係歌舞昇平期，連歐豬孳息都回落，同原本預測嘅愁雲慘霧啱啱調轉，個市咁易估就個個都係股神。乜嘢都係物極必反，呢排係「衰股」當道，比亞迪（01211）呀，上實（00363）呀，全部醜女大翻身，尋日輪到太陽能股，多晶硅價格上個禮拜升超過3%，以升幅計係八個月以來最多；馬後炮咁講，其實上個月已有分析預告多晶硅價格會見底回升，皆因多晶硅大平賣會減少供應。

講到衰股，兩隻風電設備股中傳動（00658）同金風（02208）亦有表現，但做得衰股梗有唔少缺點，例如太陽能上游股係最受歐洲莫財影響嘅板塊，歐豬要勒緊褲頭過日子，而玩太陽能係奢侈品，所以炒衰股亦要知有所所進退。

莎莎（00178）公布第三季度營業額升咗29%，雖然較中期業績增長放緩，但尋日股價仍勁升超過一成，並帶動金飾鐘錶股亦回升，就快龍年雙春兼閏月，除咗吼實龍B概念股之外，金飾股亦會受惠，皆因中國人結婚生仔鍾意送金飾，又有保值作用，而金價喺祖國買金消息帶動之下近日已回升。

藏水（01115）又創上市後新低，建行（00939）低位減持7球，上市時已話隻股單一客戶、單一水源好大風險，但新股係炒供求而非講基本因素，時間先係股票嘅最大考驗。尋日有4隻細粒新股上市，結果「三高一低」。

雖然個市輪流炒落後不亦樂乎，但尋日唔少實力股被洗倉，包括新奧（02688）、瑞聲（02018）同百麗（01880）等，市值超過200億嘅公司唔見幾個巴仙都唔嘢小，究竟芬佬係追落後抑或托高來沽真係考起，但睇港匯一直偏強。

國航（00753）連升4日，尋日更急升5.5%，瑞銀出報告話公司管理層估計內地航空市場需求會有9%增長，所以公司亦會提升運量一成去滿足需要。但尋日收市後國航公布十二月運量係繼續回落，客運周轉率升3.8%（全年升8%），貨運周轉率就跌16.6%（全年跌2.5%）。

提升運量滿足需求

舊年下半年航空業的確唔多好景，尤其係貨運最慘情，今年雖然要面對高鐵進一步威脅，但證券界普遍對飛機股今年前景轉趨樂觀，主要係內地同胞鍾意外遊，而機票價格今年有望整體加價。貨運業雖然仍係較為呆滯，但只佔飛機股盈利一成，而且長遠仍有睇頭。

大和之前出報告亦最睇好國航，但南航（01055）都有唔少捧場客。國航管理質素較有信心，而國際航線則較多；南航以國內航線為主，舊年高鐵出事，所以佢股價亦表現最好，但今年無風難起浪，風水輪流轉可睇番國航。

古勝