絲絲講場：「紅衫仔」經紀式微
港股成交慘淡，經紀行「叫苦連天」！為咗生存，中小型經紀行惟有度橋自救，點救？慳啲使囉。絲絲收到料，約廿家經紀行決定向港交所（00388）交出「紅衫仔」，即係放棄喺交易大堂嘅交易枱，將出市員搬番辦公室。依家交易大堂嘅出市員人數已不足100人，同十年前有逾六百人相比，真係今非昔比！
交易枱加租逾一成
聽絲絲朋友講，近幾個月大市成交不斷萎縮，加上交易大堂證券交易枱月費由舊年十一月起，由6,500元加到7,250元，加幅達11.5%，喺節省成本嘅大前題下，有經紀行惟有不再續租交易枱。
事實上，出市員近年「買少見少」。二○○○年十二月初仍有逾六百名出市員，到去年十二月初只有97名。過去幾個月，出市員只維持喺100至110人左右。現每個交易枱最多可有出市員2人，若有經紀行不再續約交易枱，出市員人數勢將再大幅減少。
除咗減出市員外，有中小經紀行亦減報價機，總之慳得就慳。證券及期貨專業總會會長王國安直言，今年個市好艱難，最主要係看不到前景。散戶又無心戀戰，可以預期股市成交一潭死水。佢仲話佢早就話過依家情況仲衰過沙士啦！
「開源唔到咪節流囉」
證券學會會長李細燕話，中小經紀行「開源唔到咪節流囉」，有經紀行減報價機、減出市員，但暫未裁員。業界惟有積極爭取佣金二級制，以保障行業的飯碗。
今日證券及期貨從業員工會，將上街遊行抗議港股加時，港交所會出來接請願信，但係咪信照接，加時照行？
余絲韻