商業零售賣明星效應，估唔到呢一套連金融界都啱用。花旗銀行嘅明星分析員Mark Mahaney近日就紅到發紫，被捧為科網股中最具影響力分析員，皆因佢成功幫花旗打低其他投行，接咗美國房地產訊息網站Zillow嘅IPO！
Zillow嘅總裁Spencer Rascoff事後仲公開表示，揀花旗部分都係因為Mark嘅星級魅力！
46歲嘅Mark喺二○○五年加入花旗，近年建立唔少豐功偉績，二○○八年曾建議客戶買入Priceline.com，之後股價急漲3倍；二○○九年就曾經喺亞馬遜股價double之前調高佢嘅評級。花旗淨係靠佢嘅明星效應，就喺舊年憑互聯網嘅IPO計劃賺近2,500萬美元（約1.95億港元）！花旗仲點名讚佢嘅評級絕對客觀，無偏袒任何一間公司咁話，簡直當正佢係金叵羅！
不過Mark嘅成就，絕對係靠兩隻手同一把口贏番嚟嘅，事關每次推銷新股嗰陣，佢都會打成100個鐘頭電話，力sell投資者，難怪喺一本企業投資雜誌嘅民意調查中，佢能夠連續4年穩守互聯網分析員嘅一哥地位啦！