中國融保（08090）禮拜五就會喺創業板以配售形式上市，尋日嘅記招絲絲都有去，不過去嗰度除咗了解吓間公司之外，其實仲另有所圖喎！係乜企圖？就係佢哋嘅副主席彭文堅（Nixon）囉！成熟少少嘅朋友應該會記得，佢就係八七年版《書劍恩仇錄》入面做紅花會總舵主陳家洛嗰位靚仔小生嘞！
不過，佢當年拍咗幾年電視劇之後就棄影從商，喺○五至○七年做過能源國際（00353）嘅執董，而佢除咗係融保嘅副主席之外，仲係創辦人之一！不過Nixon近年都仲同娛樂圈有啲聯繫㗎，因為佢老婆就係名模陳沛嘉（Baila）嘞，佢哋○九年結婚嗰陣仲感動到喊晒口！
咁耐冇見，Nixon都仲係風采依然，佢同絲絲講，今次上市都算係一波三折，因為公司嘅擔保業務比較新，所以港交所（00388）審批嘅時候好多嘢都要問內地法律顧問，再加上溫州資金鏈斷裂事件影響，令對佢哋嘅審批更加嚴謹，原本諗住舊年年中上市，最後要搞到依家，盤數仲核咗三次呀！