絲絲講場:港交所打鑼大陣仗

記得去年十月,港交所(00388)度咗條新橋,上市公司只要畀出3萬8千元,就可以喺公司上市周年紀念,或者其他重要里程碑日子,喺港交所交易大堂主持開市儀式,兼且可以「敲鑼」慶祝,夠晒氣氛同熱鬧。

正所謂「肥水不流別人田」,喺尋日二○一二年港股首個交易日舉行開市儀式,港交所率先成為首間公司採用呢個新服務,打響頭炮,真係架勢呢!咁啱尋日港股又爭氣,首日高開高收,都算係夠晒意頭。

新舊員工代表參與

為咗壯大聲勢,港交所主席夏佳理同行政總裁李小加尋日更加「粉墨登場」,雙雙敲響銅鑼,示意二○一二年正式開市。董事史美倫、鄭慕智、郭志標、李君豪、利子厚同黃世雄、加上一眾交易所高級管理層亦都有出席。

不過,最特別要算係三名尋日至返工嘅新員工,同埋兩名一九八六年交易廣場交易大堂啟用前已在職嘅交易所員工,都有份參與今次儀式。

據講,新舊員工一同參與,係有特別意思嘅,象徵交易所前面嘅路向,除咗要維持穩健基礎之餘,亦會銳意喺日益激烈嘅競爭環境下捕捉新商機。

參考過港交所本身「擦靚招牌」嘅行動,其他上市公司唔知會唔會心動,試吓去開市儀式「敲鑼」呢?

余詩韻

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!