孖妹缸湖遊:技術分析派點睇後市?

今時今日炒股除咗睇基本因素,仲要睇埋技術分析至夠全面o架!之但係外圍咁反覆,孖妹估計龍年恒指都係凶多吉少。俗語話:「跌市莫估底!」不過做人要有底線,股市亦唔會無底,所以估吓又何妨呢?今期孖妹一於從「圖」出發,以過去多年恒指趨勢來預測明年恒指底位有幾低?

歐美債務危機未解決,依家市場估明年首季恒指表現最差,又話會跌穿一萬點水平。老實講,人會講大話,但圖就無得呃,所以今期孖妹搵到兩位金融界「圖王」出手獻圖表,以技術分析去測吓明年恒指底位,等散戶多個投資數據參考嘛!

羅:交通銀行(香港)首席經濟及策略師 羅家聰

「對數圖」睇恒指低位

高妹:單數、雙數我都聽過,係未聽過技術分析嘅「對數圖」,佢點樣測恒指o架?

羅:由圖一所見,一九九三至二○一一年形成出一個兩截不同斜率嘅對數通道,而三個底部,即是九八年亞洲金融風暴、○三年沙士及○八年金融海嘯都掂到支持位(圖中第六條斜線),可見市場識得就住個底位去做,如果呢個趨勢守得住,再假設過去二十年來嘅基本因素無咩大改變,咁恒指下次再試嘅底位應該就係12,000點;但如果明年出現環球大亂,如歐元區瓦解或者中港樓市大跌一半或以上,咁恒指個底就未必係12,000點,到時就會破底。

高妹:另一張拼圖上下左右都係數字,好難睇得明喎!

 羅: 圖二嘅拼圖係純粹以圖樣對圖樣嘅相似度去分析,如果根據十年半前嘅科網股泡沫爆破、美國九一一事件連沙士嘅跌勢,咁恒指有可能喺明年四月或二○一三年十月見底,而兩者同樣處於12,600點上下。

鄧:致富證券資產管理董事鄧澤堂

大市或下試10762點

祺祺:哈哈,我睇得明圖表三嘅數據,但咁就可以計出明年恒指底位?

鄧:以過去幾次熊市歷史數據去推算,恒指下跌周期約12至37個月,平均數約為18個月。如果單以數字去考慮,自一○年十一月嘅24,989點高位計起,至今年十月共下跌12個月,或顯示大市已見底。否則明年四月最有機會見底(自高位下跌18個月)。另外,如果以跌幅計算,過去幾次跌幅嘅百分比為45.31至66.59%,平均數為56.93%。若再以24,989點高位計算,回吐45.31%嘅幅度為13,666點;如達到56.93%平均跌幅嘅話,恒指則有機會下試10,762點。

祺祺:哦!但圖表四咩數字都無,淨係得一條趨勢線嘅?

 鄧: 按照呢張月線圖嘅趨勢線去睇,港股一直都係保持向上形態,由九三年、九八年、○三年同埋○九年嘅熊市低位所引伸出來嘅趨勢線,可以睇到恒指有機會喺12,500點至13,000點左右水平見底,因為呢個水平係恒指嘅重要支持位。由此可見利用唔同嘅技術分析去計算,測出來嘅結果都會有少少唔同,好似圖三及圖四嘅預測,明年恒指個底有可能係13,666點、10,762點及12,500點至13,000點,現時歐美債務危機仲未解決,如果明年有大鑊嘢爆出,到時恒指就會再尋底。

你今年的股票投資成績如何?

今年全球股市突轉差,內地A股跌回十年前水平,港股同樣失色。總結今年,你的股票投資成績如何?據今期《東方產經》網上民調,截至上周末晚上六時嘅結果顯示,32.8%表示「蝕50%或以上」,25.4%表示「蝕30%至49%」,25.4%表示「蝕10%至29%」,4.5%表示「蝕10%以下」,只有11.9%表示「打和,甚至有賺」。

(高妹)

(祺祺)

若有料報畀高妹同祺祺或有嘢問,可電郵money.biz@opg.com.hk

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!