絲絲講場：港交所派對 夏佳理豪送禮

港交所每年聯歡會都有特定主題，記得年前以西部牛仔做主題，入場人士都要着成牛仔咁款，都不知幾有型。今年就玩懷舊，主題係「回憶之夜」，仲建議「dress code」係要穿着懷舊服裝，絲絲都好想睇吓「古着版」夏佳理同李小加係點嘅樣呢？講開「回憶之夜」，自然令人聯想起夏佳理6年任期就快到，懷念吓佢喺交易所日子嘅一點一滴。不過，有交易所中人同絲絲講，距離離任仲有4個月，未有咁快搞歡送會，但遲下要諗吓有乜新形式啦。

證監會聖誕卡見熊

講開又講，證監會聖誕節亦有搞作，寄出聖誕電子卡，但收卡人無不有「驚喜」，因為張卡印咗隻北極熊，原意係地球暖化，引起大家關注北極熊嘅生存空間，所以張卡一年四季都出現「熊蹤」，唔知股民見到會點呢？

余絲韻