絲絲講場:名軒底厚金勞詹入飛

大大隻嘅新股近排齊齊潛水,只好寄望啲細細粒又有名牌效應嘅,而打算做今年最後上市新股嘅「名軒」,就有「上海名人飯堂」同「汪道涵之子董事」做話題,尋日仲加多個「金勞詹」詹培忠入飛。

詹培忠可能真係錢多得滯,絲絲問佢係咪入咗飛認購名軒,佢諗咗一陣至醒起,問佢認購幾多,佢就話「好少啫,捧吓場」。

要做內地餐飲界「LV」

有賓卡就講,前排大閘蟹時節去過上海名軒總店視察,真係撞到好多達官名人宴客,飲酒食蟹好似倒水咁。名軒創辦人兼主席陳大寧成日話要將名軒做內地餐飲界嘅「LV」,聚集政府要員、企業高層同富豪喎。名軒招股書披露,上星期啱啱委任兩位重量級獨立非執董,一位係四叔愛將陽光房託(00435)管理人陽光資產管理主席謝偉銓;一位係汪致重,原來佢係已故前海協會會長汪道涵第二個仔,現任上海向陽公益基金會法人代表。

絲絲好奇名軒來頭咁勁,點解只上到創業板呢,賓卡叫絲絲睇公司盤數,發覺名軒一○年有成1.23億元(人民幣‧下同)收入,但溢利唔夠一千萬元,原來已耗存貨成本食咗收入嘅56%,響大陸開舖成本真係好高。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!