絲絲講場：新股紀念品得啖笑
今年重點新股周大福珠寶（01929）同新華保險（01336），尋日齊齊上市兼股價潛水，兩家公司送畀港交所（00388）嘅紀念品仲搞笑，一個送「A貨」，一個擺烏龍，真係咁啱得咁蹺呀！
周大福送A貨鑽石
周大福珠寶嘅禮物，一拎出來隨即引起全場嘩然。咩嘢咁把炮？就係周大福舊年用兩億幾買返嚟嘅南非鑽石原石。不過，大家千萬唔好誤會，送畀港交所嘅，只係一模一樣嘅仿製品。噢！原來周大福送「A貨」啫！
新華保險搞錯日子
新華保險就送咗隻船畀港交所，寓意揚帆起航同進入國際資本市場，貫徹「中國風格」。不過，有人發現個船座上面刻住一一年十一月上市。咦，莫非時光倒流，定係公司原本想十一月上市㗎？