絲絲講場：高盛大刁王Mark哥傳劈炮
被譽為投行界頂尖購併顧問嘅高盛亞太區（日本除外）副主席Mark Machin，有消息話佢將會離開高盛。大家都知Machin擅長做大刁（Deal），早年幫和黃（00013）做咗單高達50億美元嘅債券再融資債券，已經令人津津樂道，銀碼之大盡破當時亞洲紀錄。今次Machin求去，令絲絲感到相當意外。
25歲突棄醫從商
其實Machin嘅經歷都幾富傳奇色彩，事關佢喺牛津大學讀醫出身，年僅廿五歲已經係痳瘋病嘅醫學界新星，不過愛好經濟嘅佢就喺九一年毅然轉戰金融界。Machin講過，佢唔相信輪迴之說，所以希望有生之年可以喺金融界打滾番幾年。點知Machin一做就廿年，今年Machin都只係45歲，可謂正當盛年，雖然未知佢人生計劃下一步係點，不過有傳佢出年一月會由北京回流香港。
煲大刁耐性十足
唔知關唔關長時間做醫學研究，培養咗Machin嘅專注力，佢做刁時特別具耐性，如幫台灣中華電信私有化，Machin足足花咗六年解決政策及金融等障礙，仲話私有化係投行銀行家最高難度嘅任務，亦最有成功感。