孖妹缸湖遊：金價升金股實掂？

最近世界黃金協會季度報告指，各國央行喺今年第三季購買黃金嘅規模已經達到148.4噸，係自一九八八年各國央行購買180噸黃金後，最大規模嘅買金行動。嘩！連央行都狂買金，咁孖妹又點可以唔買呢？不過，一條足金金條閒閒地都十萬蚊以上，以孖妹嘅財力，恐怕都係買金股居多喇！之但係依家真係小心投資先可駛得萬年船，所以今日我哋就探討吓「金價升＝金股升」係咪成立先？然後再入貨都未遲呀！

盧：豐盛金融分析員盧志威

放大圖片

放大圖片

高妹： 其實「金價升＝金股升」係咪真？

　盧： 梗係假啦！黃金同金股係兩種唔同嘅資產，唔可以擺埋一齊兼用同一個標準去做分析，而且兩者喺升值或貶值、所承受嘅風險都有唔同。不過，金價同金股當然會有連帶關係，但「金價升＝金股升」並唔係一個百分百嘅現象。

高妹： 歐債危機愈搞愈衰，所以投資者避險情緒又再回升，令金價又展開升勢，遲啲周大福（01929）又上市，金飾股前景真係唔差喎！

　盧： 不過金飾股板塊已經炒咗上去喇！我估周大福上市首日只有10至20%升幅，之後大家可以沽一半、留一半，至於撈唔撈底，就真係到時睇清大環境再決定喇，之後成個板塊亦會有少少回調，然後再炒過！我都認同金飾股仲有一段好景嘅，內地人嘅買金熱潮仲未散住！

金舖做足對沖免輸錢

高妹： 金飾股話多唔多，話少唔少，其實散戶應該點揀至夠醒呢？

　盧： 講真，間間金行嘅貨（金）其實都係一樣，只係款式或銷售群會有啲分別，所以我主要會睇金行嘅對沖活動同埋市場定位兩大因素去評估金飾股。舉例，好似周大福咁，佢啲分行多達幾百間，理論上當金價跌，貨價就會跌，所以做足對沖，即沽出金嘅期貨，咁做可以令金行唔使輸啲無謂錢！第二，由於間間金行嘅貨都差唔多，所以市場定位好重要，可以決定銷售額嘅多與少，只要品牌夠好夠硬淨，而且夠深入民心，生意一定唔會太差，所以啲廣告錢真係唔慳得架。

高妹： 但我都係呻笨咗，十一月初都諗住買番啲金飾儲吓，卒之咪又係無入貨，真心傷！

　盧： 我估金價升到每安士1,900美元實無問題嘅！如果想買金股投資，買實金或黃金ETF（02840）就最好，夠貼價嘛！而我喺金價每安士500至600美元開始儲金幣，儲儲埋埋，依家啲金幣約值10萬蚊。哈哈，我間唔中都會拎出來欣賞o架！

鄺：凱基證券營運總裁鄺民彬（Ben）

祺祺： 股票唔掂，難怪「沽神」保爾森（John Paulson）都係靠佢隻「Paulson Gold Fund」（黃金基金）先翻到身，聽聞呢隻基金仲係揸重金礦股添！

　鄺： 金價同金礦股股價嘅相關性唔算好高，兩者價格亦唔可以做到即時掛鈎！佢哋嘅關係有啲似窩輪，當正股價格上升時，隻窩輪價格又未必會升。無論金價係升係跌，金礦股股價都係有少少滯後，佢需要唔少嘅利好消息配合，股價足夠波幅被炒上。

祺祺： 原來金礦股唔係追蹤金價嘅最佳投資工具嚟架，但啲人成日見金價升，就話要去買招金（01818）、紫金（02899）、瑞金（00246）喎！

　鄺： 講真，金礦股唔係淨係去掘金就賺到錢架！金礦股股價會受到公司開採成本、銷售業務表現及管理層質素等因素影響，加上開採金礦要使好多錢，當加工成本提高，或者開採過程發生環境污染等意外，佢哋嘅生意一定會受到好大影響。所以你話佢同金價嘅關係可以有幾大關聯性喇？

祺祺： Ben哥果然有道理！

　鄺： 仲有，散戶要清楚黃金同金礦股係有分別嘅，前者係商品，後者係企業，大家嘅估值方法已經唔同喇！唔使我教，好多人都知黃金有實用需求、避險需求，依家仲有埋投資或投機需求，所以當經濟唔好或高通脹出現，大家都會去買黃金避險，不過現時係避險需求同投機需求角力中，加上近期金價都算處於高位，美元又較強勢，所以我覺得年底前金價唔會大升，明年金價會喺每安士1,600至2,000美元區間上落。

實金黃金ETF最貼市

祺祺： 咁我又應該點投資黃金至啱呀？

　鄺： 金礦股個格局都幾悶吓，通常係窄幅上落，就算喺低位買咗貨都未必夠位沽，如果真係想炒，惟有睇時機博佢反彈！當金礦股跟金價跌，又真係跌得好深時，就可以入少少貨博反彈。不過，炒金當然係買實金同黃金ETF最貼喇！

港股悶局未破，你已提早「收爐」離場嗎？

港股自本月一日興奮狂升後，近日交投又轉歸平淡，恒指窄幅上落。在如此悶局下，你是否已提早「收爐」，先過一個悠長假期，明年再戰呢？據今期《東方產經》網上民調，截至上周末晚上六時嘅結果顯示，44.9%表示「是，已收爐離場」，55.1%表示「否，仍奮力作戰」。

若有料報畀高妹同祺祺或有嘢問，可電郵money.biz@opg.com.hk

高妹 祺祺