市場熱線：留意單邊市訊號

歐盟臨尾關頭卒之傾掂修改條約，剩得英國阻頭阻勢，英國佬不嬲覺得自己喺歐洲高人一等，但依家26：1處境尷尬。其實達成協議只係換湯不換藥，赤字唔超過GDP3%講就容易。依家最緊要氹掂標普，歐洲15個國家、EFSF、歐盟同各大錢莊齊齊降級嘅話，真係一鋪清袋。

國策以「穩」字行先

歐洲場大龍鳳暫時又告一段落，今日要睇吓歐債孳息同標普有乜後續發展。上個禮拜畀歐洲搶晒鏡，其他經濟數據都行埋一邊，其實花旗國消費者信心、攞救濟金人數、中國CPI同PPI都報喜，十二月仍係炒股嘅好日子，只不過宜低吸、忌高追。

祖國十一月CPI同PPI齊齊低過預期，尤其個PPI大降到2.7%，即刻班專家又話會減RRR繼而減息，專家亦話國策將會由「抗通脹」變成「保增長」。今個禮拜開中央經濟工作會議，上周五政治局會議強調「穩」字當頭，「穩」好過「緊」，亦冇可能咁快變「鬆」。不過，既然預期放水，點解A股會毫無起色呢？內銀同內險股更係上周五港股重災區。

祖國禮拜六亦公布埋貿易數據，十一月出口增長得13.8%，咁樣走勢，出年可能得單位數字，唔靠出口惟有靠內需，所以內需股長買長有，落後股反而係有「內需王」之稱嘅百麗（01880），大股東同基金股東先後批舊股，連insider都沽貨，做散戶去接貨豈非喊三聲？但有時又唔係咁計，估值係你追我逐，當二線嘅達芙妮（00210）都開始追上來，百麗或者被迫加多兩鞭。

三隻新股上周五上市遇冷鋒，結果得冇人幫襯嘅一化（02121）「爆冷」唔使穿底，新股愈少人認購表現愈好已經唔係新聞，古勝有興趣睇吓大超額嘅OTO（06880）會唔會益街坊？國電科環（01296）招股撞啱大跌市孖展未開齋，但喺芸芸新股當中，呢隻反而較有獨特概念，主要業務係火電脫硫裝置，屬正宗國策股，但缺點係PE嫌高。

新股出閘升跌難料

今個禮拜四三大新股同日上市拗手瓜，但有消息話海通（06837）可能臨門撻Q，周大福（01929）最終以下限定價，有水位上升反而係好事，但計PE最貴係周三上市嘅寶信（01293）。呢個禮拜八隻新股冇乜邊隻有心水，創業板嗰隻唔識睇，OTO細細粒容易食，但不太貪心反而可小試周大福。

過埋呢個禮拜新股上市高峰期，芬佬可以疊埋心水放聖誕假，年尾有機會粉飾窗櫥，但亦恐防新股上完之後功成身退。恒指頂部同底部一路收窄，而10日、20日同50日平均線幾乎疊埋一齊，個市似乎就快要行單邊，希望今個禮拜會有啲啟示，由16,170點與17,613點伸延上來的重要支持位17,860點不容有失，若指數一旦上破19,300點長期下降阻力，中期反彈將會展開。一一年由六月開始跌到依家，意粉國債息一度升到8厘樓上尚且死唔去，古勝直覺今年底至明年初應有生機。

美聯（01200）跌番7.5%，做官嘅最忌亂噏廿四。想要樓價穩定，最好學新加坡咁樣，外國人買樓（最主要針對祖國同胞）要畀多一成印花稅，又可增加庫房收入。

古勝