絲絲講場：中國入世十周年 美媒體高調贈興
今個星期日喺中國貿易史上極具意義，事關當日就係中國加入世貿（WTO）十周年嘅大日子。有美國媒體就用美國嘅微波爐愈賣愈平，中國嘅吉普車（Jeep）愈賣愈貴，嚟形容中國入世後，中美兩地貿易門檻嘅高低，明寸中國商務部部長陳德銘話美國限制對華嘅高科技出口！
對部分人嚟講，微波爐可能是生活必需品之一，喺美國電器店一個中國製嘅微波爐最平賣幾錢呢？據《紐約時報》講，如果唔介意牌子同功能，喺美國一個微波爐最低49美元（約382港元）就有交易。點解咁平呢？之唔係因為內地家電產品大量傾銷到外地市場，全世界消費者當然得益啦！
怨華徵美國車極高關稅
咁喺中國買美國貨呢？以最具美國冒險精神嘅Jeep為例，喺美國最平賣2.75萬美元（約21.45萬港元），但內地同一款車就要賣逾8.5萬美元（約66.3萬港元）。
點解？除咗因為品牌效應同運費外，最主要原因係中國對進口汽車收取極高關稅，但絲絲心諗優質嘅美國貨賣到好價，亦反映中國人消費力近年急劇升呢，連蘋果公司嘅iPad同iPhone都炒到天價啦。
余絲韻