市場熱線：中交建展新升浪

新華保險（01336）尋日截飛，今日周大福（01929）同海通（06837）亦完成任務，恒指升近100日平均線有可能要抖吓氣，等月中幾大新股掛牌同月尾粉飾窗櫥再衝刺。新股反應最架勢係OTO（06880），細細粒效應今年先後有米蘭站（01150）同唐宮（01181）爆升，但依家已先後潛水，而專業旅運（01235）更從未炒過，OTO頂多係短炒格，但上市後人人鬥快食胡嘅話盞累鬥累。

輻射遺害已浮面

幫寶馬做代理嘅寶信汽車（01293）亦喺尋日截飛，相關概念股如大昌行（01828）、中升（00881）同華晨（01114）齊齊鳴金收兵，但汽車股表現唔錯，連同航運股、奶品股、鐵路建設股均屬突出板塊，不過航運股同奶品股係彈散格局。

奶品股因為日本奶粉驗出核輻射而炒起，但祖國自從三月地震後已冇入口日本奶粉，其實祖國近日推出乳業新國際標準引起唔少爭議，新標準明升暗降，有明益國產乳業同牧業之嫌。但父母對國產奶粉唔信任，只會更傾向買外國奶粉。

至於東洋國嘅核輻射事件陸續曝光，官方已冚唔住，最嚴重問題係輻射物滲入泥土，食物安全可能要向外求。東洋國農業養起唔少人，農產品又超貴，核輻射隨時重創東洋農業同經濟，而食品外求相信不離中國，中綠（00904）原本係受惠股，但股價已一沉不起。

中通服（00552）講咗大半年嘅供股計劃終於獲得中央開綠燈，但仲未有供股價；同係國企，財險（02328）供股就話咁快除埋淨，都唔知乜嘢準則；而中石化（00386）旗下嘅冠德（00934）宣布供股，暫時亦未知供股價，又唔知會搞到幾時；昆能（00135）買北京燃氣單嘢更係1年都未掂，呢類風險好惡估。

海事建設佔優勢

兩條鐵尋日均大升，但中交建（01800）只升2%，皆因鐵路概念股已大翻身，孖屐認為出年鐵路建設又會重新擺上枱。兩條鐵今年插完又插，就算呢排反彈亦有排未返家鄉，相反中交建就只係喺5蚊至7蚊之間浮沉，7倍PE跌佢唔親，但祖國基建投資減慢，又唔慌有大增長。

古勝呢排揀股都係以穩陣為先，低吸求低風險兼穩健回報，呢兩日推介嘅東風（00489）同創維（00751）就係例子。兩條鐵主要靠鐵路，大和上月尾推介中交建，原因係睇好海事建設。中交建原來佔咗內地沿海港口建造8成市場，亦佔公司4成收入，而海事建設未來嘅複合增長率達16%，所以中交建嘅增長潛力可能被低估。

不過，中交建距離下次派成績表仲有三個月，喺未有突破因素之前，暫時建議仍係炒上落為主，目標價係佢嘅強大阻力位7蚊。

古勝