絲絲講場：法巴鄺樂天係小說家
做股票嘅，眼裏係咪得錢呢？絲絲認識嘅法巴投資亞太區股票主管鄺樂天，似乎唔屬於呢類，Arthur哥比起絲絲，文采仲高好多班添！
Arthur投資叻，原來寫作都好掂，佢讀書年代已開始寫散文同作詩，近年仲開始寫埋武俠小說，而且仲已經寫咗10萬字添。
享受寫書過程
不過Arthur就話10萬字距離目標好遠，睇怕出版係遙遙無期嘅事，但佢就好享受寫書嘅過程，仲話有時會同朋友傾吓小說嘅發展、主角嘅經歷，其實已經令佢好享受。就算本書最終都寫唔完，但自己都享受咗當中嘅過程啦。
體驗自然力量
本書寫得耐，除咗由於工作忙碌外，Arthur話同個人興趣比較多亦有關，佢平日會睇大量天文同地理書籍，話自己曾經想過做天文學家同地質學家，所以近月特登去冰島睇火山，而且喺日本發生地震後不久，仲去到日本災區，睇睇大自然嘅威力，不但唔怕死，仲好有求知欲添。唔通呢個就係基金經理成功嘅原因？絲絲心諗，要做作家，係咪要「張張刀、張張利」至得？