絲絲講場：股神15億買家鄉報紙
「股神」巴菲特又再次令市場人士跌眼鏡，宣布買入其家鄉報紙《奧馬哈世界先驅報》集團，一改佢兩年前喺巴郡股東大會上警告印刷媒體前途黯淡嘅口風，依家改口話報業雖然不會重返過去嘅高峰，但仍有不錯嘅前景。
巴菲特斥資約兩億美元（約十五點六億港元）收購該報，包括承擔公司約五千萬美元債務，賣家係持有該報股權嘅退休同現職員工，及慈善基金Peter Kiewit Foundation。巴郡本身已經係《華盛頓郵報》大股東，現時再收購全美第四十九大嘅《奧馬哈世界先驅報》集團，旗下印刷媒體事業版圖進一步擴大。
情意結作祟
今次收購計劃同佢嘅投資習慣不符，有分析就話因為佢做細路仔時派過報紙有關，即係話係情意結作祟多過想賺錢。不過，巴菲特向來投資眼光獨到，投資《華盛頓郵報》獲利甚豐。