絲絲講場：郭樹清向黑手宣戰
過檔做中證監一哥已經滿月嘅郭樹清，尋日終於首次用主席嘅身份，喺公開場合講佢對資本市場嘅管治思路。第一炮就向做內幕交易嘅黑手宣戰，呢輪個市大上大落，佢告誡班賺錢唔多，同埋已經退休嘅人，股市係唔啱佢哋架！
「發現一宗就查處一宗」
郭樹清講深化資本市場嘅改革，創新其中一項要求，就係切實加強誠信建設，佢仲鄭重聲明中證監對內幕交易同證券期貨犯罪係「零」容忍嘅態度，發現一宗就查處一宗。
佢話小偷喺街市度偷一棵白菜，大家就會義憤填膺，但如果有人將隻手伸入成千上萬股民嘅銀包，卻唔會引起大家嘅重視，呢啲先係實質嘅內幕交易，係最難防範同打擊嘅。
股市令萬千國人魂牽夢縈，郭樹清認為，要確保將合適嘅產品賣畀合適嘅投資者，低收入同埋嗰啲以退休金維生嘅人，可能唔係咁適合參與股市，應該建議佢哋多啲考慮風險較低嘅投資同儲蓄工具。咦，聽落十足政府宣傳股市有風險嗰啲對白喎。
余絲韻