市場熱線：歐債危機沒完沒了

歐洲魚缸上周五有反彈，但諗唔到上升原因，意大利國債唔止見7，兩年息短債孳息更衝破8厘，削赤追唔上利息成本上升速度，咁樣借「大耳窿」法肯定捱唔到幾耐就要求救。坊間推測歐債危機最終後果有3大可能性，有民調話有接近8成德國人反對歐聯共同債，德國亦口硬唔接受任何將債務「貨幣化」建議，但可能最後會被「逼宮」接受印銀紙同發行歐聯債，問題係仲有排捱，未等到嗰日已輸死。

利豐有條件反彈

葡萄牙、匈牙利、比利時連環降級，班打手護主心切，老美削債傾唔掂數輕輕帶過，卻咬住其他國家唔放，如果唔係，美國10年債息點會低過兩厘？估計歐洲甚至日本降級事件仍陸續有來。老美雖然計牌面擺出「中國威脅論」，不過以出口產品類似度，競爭對手始終係歐洲，但歐元一路貶值落去，老美出口競爭力就會削弱，而花旗企業第4季成績表已經唔敢樂觀。

花旗國「黑色星期五」據講銷售幾好，增長超過6%，但睇電視見到搶廉價貨品搞到要批(月爭)踩人兼用胡椒噴霧，堂堂最有錢國家失禮死人，亦有分析話人窮先至要趁呢段減價時間搶購。香港上個禮拜有間百貨公司大減價同樣人山人海，其實買嘢使乜逼餐死，今日係「網購星期一」，網上購物近年嘅增長速度相當驚人。無論係點，美國聖誕零售消費旺場，最開心肯定係利豐（00494），今日有條件反彈。

業績股全部見光死，創維（00751）同阿里巴巴（01688）衰過預期係抵死，JOYCE（00647）同其他賣衫股一樣喺內地銷售大跌，但連賺到破紀錄嘅德昌（00179）都要陪跌，古勝反而較睇好創維，雖然話家電下鄉要收檔，但3D電視漸趨普及，連中央電視台亦要整個3D頻道，3D睇波的確幾吸引，而創維PE又低，3蚊邊博得過。

細價新股夠硬淨

六福（00590）今日派成績表，8連陰之後已經比本月高位唔見10蚊有多，周大福今日推介會前要減價，所以其他金飾股都冇運行。周大福以20倍PE招股仍然唔算低，仲係計13年PE，兩年後個世界乜嘢環境已好難估，話唔定出年已經世界末日。

雖然話周大福初步反應麻麻，但近排幾隻細細粒新股都冇破發，新股冇散戶落疊，學鄭家華話齋可以「圍飛」作歹，得10球街貨嘅廣豪（00844）上周五勁升31%，純粹係膽博膽遊戲。

恒安（01044）同維達（03331）一向係逆市奇葩，皆因日用品股唔受經濟環境影響，而維達升穿10蚊認真巴閉，公司話開拓衞生巾業務成為炒賣重點，其實維達舊年已宣布過進軍衞生巾同紙尿片業務，實行做「恒安第二」，但等收成仲有排，計到市值更係蚊髀同牛髀。

古勝