絲絲講場:脫離「危險海域」許浩明甩難

海域集團(01220)尋日正式通過重組方案,即係呢間公司重生進入直路,而一直「愁困襄陽」協助臨時清盤人嘅許浩明(Herbert)就真正宣告甩難。絲絲打畀Herbert,佢劈頭就慨嘆話:「五年幾啦」!

「出咗事最緊要肯承擔」

海域系喺○七年出事,到○九年中,許浩明三個字先至由海域訴訟嘅被告人名單中刪除,到今日轉眼又兩年幾嘞,Herbert好感慨咁話,對佢嚟講,係人生嘅重要里程碑,期間受盡千夫所指喎,不過佢話公司管治嘅嘢,發生問題好難避免,最緊要出咗事要肯承擔,搞掂佢為止。

依家海域孖寶,(02882)已經由黃英豪照起,變身成為香港資源,海域集團就將會由內地金山鋁業老細吳偉強同蒙慶材入主,Herbert終於可以完全脫離呢個「危險海域」。

由於已經回復「清白之軀」,絲絲問Herbert會唔會返董事學會做主席,佢就話會專心同黃英豪打拚,同埋自己又做緊連發國際(00875)白武士,所以都會減少啲公職。

希望新馬可標個「尾會」

不過,講起佢啲愛駒,Herbert又即刻精神番晒,佢隻「甜蜜至上」呢排狀態唔錯,仲有隻自購新馬「甜情蜜意」,就將會響十二月首度出賽,佢話上次拉頭馬已經係舊年五月,希望可以標個「尾會」,威番次。

余絲韻

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!