內地可能好快就會見到第一隻體育概念股嘞，個名叫做「喬丹體育股份有限公司」。但呢個喬丹唔係籃球大帝米高佐敦，公司英文商標叫「QIAODAN」，係抽人哋水嘅國產貨，可以話係Ａ股首隻山寨名牌添。
喬丹體育係喺二○○二年為公司嘅文字同圖形商標辦理登記，仲喺二○○九年成為「馳名商標」。係人都知道飛人佐敦嘅圖案由Nike獨家生產，以為攞住８項防禦性商標掂梗嘅Nike，竟然喺二○○八年先至向內地申請將米高佐敦成為商標，梗係即刻畀商標局駁回喇。
喬丹曾經澄清同佐敦無任何合作關係，都冇利用過大帝嘅形象做宣傳，但佢哋就講唔出，點解將佐敦兩個仔嘅名都拎咗去註冊。公司將個名改做喬丹，根本就係抽人哋水，仲將生意做大，申請埋上市Ａ股。唔怪得內地傳媒封佢哋做「山寨之王」喇。
Nike慘敗，只係眾多國際品牌喺內地焦頭爛額嘅商標爭議之一。專家話國際品牌成日畀人侵權，係因為佢哋忽視咗註冊，內地註冊係鬥快嘅，商標畀人截胡真係一殼眼淚。