孖妹缸湖遊:年尾最後衝刺

臨近年尾又係大家準備收爐嘅日子,今年港股走勢受外圍因素影響,八月頭開始,恒指展開咗一個既漫長又反覆嘅跌浪,搞到今年孖妹嘅炒股成績肥咗佬,真係激死人喇!依家距離聖誕節仲有一個月,孖妹決定力挽狂瀾,勢將「肥佬」變「PASS」!至於今年我哋啲「魚缸之友」喺私人投資方面賺定蝕?咁就要由佢哋講番喇!

恒豐證券董事總經理 張華峰

年終炒股金句:「今年港股好混亂,我炒咗一輪都係得個吉,依家收手喇!」

「今年港股好混亂,恒指忽上忽落,連我主力買賣嘅港交所(00388)股價都跌唔少,所以我嘅長線投資就輸咗,但短線計就打個和囉。總之今年我炒來炒去,辛苦咗一大輪,結果都係得個吉!依家歐債危機發展仲未明朗化,內地嘅宏調仲要啲時間去慢慢揣摩,現時我對外圍因素都仲未睇得好清楚,所以今年平平穩穩過咗去就算喇,剩番一個月時間,我決定收手喇!」

信誠證券基金經理 王海翔

年終炒股金句:「財不入急門,臨近年尾都係保守啲好,明年再重新出發!」

「我嘅工作係幫公司客戶負責投資股票,而八月頭港股大跌嗰一下真係最大鑊,好彩我本身個股票組合以藍籌股為主,所以嗰個月嘅組合帳面都係蝕咗5%左右,好彩唔算輸太多喇!至於年初至今嘅賺蝕表現,暫時成績都係打成平手,但數字上亦都可以講係跑贏大市嘅!由於我睇唔到未來一個月會有形勢大好嘅投資機會出現,所以我決定唔再博喇,投資策略會以保守穩健為主。加上外圍因素仲係咁不明朗,如果散戶嘅買賣太過進取,投資風險真係幾高架,正所謂財不入急門,今年打個和就算數喇,總之明年再重新出發!」

僑豐證券鰂魚涌分行經理 譚梓業

年終炒股金句:「下半年炒股票可以用血流成河去形容成績,不過我唔會心灰意冷嘅!」

「我喺八月同九月炒賣嘅股票輸得最多錢,喺恒指22,000點開始買貨,點知後來次次都係一買就跌,好似中國熔盛重工(01101)、金山軟件(03888)、保利協鑫(03800)等等,真係可以用血流成河去形容呢個慘況!雖然我知道最後呢一個月追唔番條數,但我唔會心灰意冷嘅,依然會繼續發掘啲有動力嘅股票,然後重錘出擊,盡量贏錢!」

致富證券資產管理聯席董事 莊志豪

年終炒股金句:「八月份我玩股票期權輸咗唔少錢,最後一個月我決定向港股舉手投降!」

「今年我學人玩股票期權,最後得出個教訓,就係唔熟嘅投資工具真係要小心去操作。七月時,我做咗幾張兗煤(01171)嘅Short Put(沽出認沽期權),點知八月九日港股收市大跌逾千點,累我要即刻平倉離場,輸咗我幾萬蚊呀!好彩我喺十月份發力狂追,又買正股又炒黃金同埋炒日圓,先至賺番些少,不過今年埋單計數都要輸12、13%,未來港股市況好難估,雖然今年恒指已經見咗底,但現時佢受制於100天線,預計年底前最高只可升至20,800點,加上外圍因素又咁差,我都係向港股舉手投降。」

元朗股神 曾錦安

年終炒股金句:「港股都係上落市為主,所以我會短炒牛熊證,贏一次錢夠輸三、四次喎!」

「好好彩,我今年係贏錢嘅,不過就仲未計贏幾多!好似思捷環球(00330)咁,我早喺佢公布業績之前,就做咗張Long Put(買入認沽期權),一個星期後佢股價狂瀉,我就即刻賺錢。其實今年輸錢嘅人主要輸在趁低吸納,佢哋以為18,000點係個底,點知後面仲有16,000點等緊大家。由八月開始計,其實恒指跌幅唔算多,反而啲股價跌得勁就真,好似隻中國中鐵(00390),真係由6蚊跌到落2蚊都得架!好似今個月,港股以上落市為主,我炒牛熊證真係一隻都未輸過,而且牛熊證本小利大,真係贏一次錢夠輸三、四次。不過聖誕節就快到,港股通常都係悶局居多,總之個市啱玩咪繼續玩囉,我無收爐呢樣嘢嘅!」

英皇證券荃灣分行散戶 陳姑娘

年終炒股金句:「今年都輸咗三成錢,之前我都提醒自己要忍吓手,可惜職業病呀,希望之後炒少啲喇!」

「我由五月份開始輸錢,炒正股又輸,炒期指又輸,加上本身長線投資嘅股票價格又大縮水,到現時為止,我諗我都輸咗30%錢,最後呢一個零月都係追唔番架喇!個市咁大風險,就算我有晒電腦去睇圖表同埋數據,一樣係玩唔掂個市,散戶都係離場算喇!其實之前我都有提醒自己要忍吓手,好多散戶都有職業病,話唔買都會走咗去買,我覺得出年恒指可能會再跌至16,000點水平,不過炒股一定係有得又有失架喇,所以大家輸咗少少錢時,最重要都係要狠心去做止蝕!」

你如何運用政府派發的6,000元?

全港已登記的合資格市民陸續收到政府派發的6,000元,對於這筆「橫財」,你會如何運用?據今期《東方產經》網上民調,截至上周末晚上六時嘅結果顯示,29.6%表示會「投資」,24.9%表示會「儲蓄」,25.3%表示會「消費」,14.0%表示會「還債」,只有6.2%表示會「捐獻」。

高妹、祺祺

若有料報畀高妹同祺祺或有嘢問,可電郵money.biz@opg.com.hk

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!