唔經唔覺，港交所（00388）行政總裁李小加上任後首份戰略計劃《2010年至2012年》已過咗一半。咁大間交易所，當然要有長遠規劃，唔會「臨急抱佛腳」，聽聞港交所現已開始着手籌備新一份嘅戰略計劃。
不過，喺絲絲嘅印象中，港交所嘅戰略計劃一向都係做3年，聽聞依家籌備嘅新戰略計劃，竟係做5年，即係由一二年到一六年。當然戰略計劃做長啲，代表交易所更有遠見抱負，但有中環友就講笑咁話，唔通李小加想喺交易所度做耐啲？又或者主席夏佳理明年四月退任，想喺臨走前為交易所制訂更長遠發展藍圖？
對於首份戰略計劃，李小加話雖然已經取得一定進展，但要全面推行計劃，仲有好多挑戰，矢志要完成各項目標。李小加到出年年底，三年任期亦到，大家當然好關心佢會唔會續約，完成佢自己訂下嘅多項目標。
每逢年尾，大家最關心梗係有冇人工加，港交所今季業績雖然麻麻，但聽聞明年平均加薪會跟大圍，即係不錯咁喇。有薪酬調查顯示，受訪企業明年平均加薪有5%，而金融服務界更高，有6.5%。
余詩韻