絲絲講場:郭樹清新官亮相脫腳

自從中央上月底宣布搵郭樹清做中證監嘅新主席後,直到尋日佢至第一次用證監主席嘅身份公開亮相。

平衡術一向高超嘅郭主席竟然仆親,社保基金理事長戴相龍即刻扶佢一下。網民嘅轉數真係高,直指依家A股咁弱,唔通預示社保基金會積極救市?

唔講股市 同觀眾致歉

郭樹清一早已經應承咗出席國際金融論壇2011年全球年會,佢尋日演講時先同觀眾道歉,因為轉咗工,原本想講國際貨幣金融體系改革嘅,最後改為講世界經濟再平衡。郭樹清專登唔講股市都可以理解嘅,畢竟上任未夠兩個禮拜。

喺郭主席咁多著作裏面,有關失衡同平衡嘅論述有好多,呢個係佢拿手嘅講題。不過佢就賣口乖,話講呢個題目,係因為見到舊上司戴相龍好高興。以前戴相龍做人行行長嗰陣,佢有幸做過兩年助手,一齊做嘢好開心。點知佢突然跣腳仆親,戴相龍反應最快,即刻上前扶佢。

呢個動作引起唔少網民回應,有人話名人出場都有指定動作,好似當年鐵娘子戴卓爾夫人咁。有人扶一下就即刻企起身,莫非股市一救就反彈?最有聯想力嘅仲話,由戴相龍出手去扶,唔通預示社保基金會積極救市?平衡最叻嘅郭樹清今勻真係老貓燒鬚嘞。

余詩韻

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!