絲絲講場：張華峰瞓身撐新世界

「好難捉摸 要睇長線」

絲絲仲同恒豐證券董事總經理張華峰傾過添！事關佢捧鄭裕彤嘅場，揸住大約10萬股，點知股價愈跌愈低，依家仲供股，佢話眼見近排港股反彈，又認為新世界嘅資產唔只呢個價，所以會照跟，希望明年可以返上9至10蚊喎。佢仲話，如果威士回落到2蚊樓下，都會考慮買入威士作增持，不過佢最後都好無奈咁話：「新世界好難捉摸，投資新世界真係要睇長線」。

新世界供股價係5.68元，威士理論價係尋日收市價7.86元減供股價，即係2.18元，槓桿比率得3.6倍，絲絲嘅老友提醒大家，威士到期就會變廢紙，唔想供股嘅朋友，應該睇價賣鬼咗佢，袋咗啲差價先。

沽正股買威士食差價

相反，睇好新世界又有閒錢嘅話，可以買威士低價增持，仲有第三個方法，現時股東可以睇價沽正股，拎舊錢嚟供股，可以慳番唔少，大家仲要留意，威士價如果高於現貨價減供股價，就係沽出機會，而威士愈近「死期」，個價同成交就會回落。

余詩韻