市場熱線：領匯收購壯大規模

魚缸前日狂炒電力股，尋日到電池股接力，一隻手數埋嗰幾隻齊齊升七八個巴仙。中東嗰邊又傳來政治不穩的風聲，國際油價連升六日，連帶一班油氣資源股都乘機發難。專用來避風頭的黃金都向1,800美元進發，金礦股搭番轉順風車，輪流炒咗一轉，漸近水尾。

祖國十月通脹數據無驚喜，按年升5.5%。數字公布後，專家又走出來指指點點，話年底有機會跌到去4%。魚缸實際偷步炒定CPI，估中央唔會再鍊得錢莊咁緊，總之生意慢慢做，唔使急。不過，古勝睇極唔明，通脹回落的背後係整體經濟唔好，中央放水畀企業一條生路行吓，當然好過一齊攬住等人救，但大家又唔好太樂觀，以為一天光晒，個市炒到咁上下就要鬆人。

東方明珠密切留意

大笨象派第三季成績表，內容唔使多講，齋睇佢喺倫敦個股價，跌咗差唔多六個巴仙就知幾唔掂。再睇埋歐洲開市全部一仆一碌，日日都飆高的意粉國債息又升穿7厘，真係要問多句，漫漫長夜，何時見曙光。

講開又講，古勝早前品題過東方明珠創業（00632），話公司高層組團到南蘇丹訪問，探討投資該國石油產業，如今行程完滿歸來，反應正面，看官宜留意故事發展，繼續追蹤。

香江的屋仔市場近排畀人唱衰，話最差情況樓價會跌幾成，地主股趁年尾狂谷新盤，一於賣得快好世界。一班收租佬因租約所限，只要租戶穩定，業務上落冇咁大。

領匯（00823）尋日派中期成績表，期內物業淨收入按年升15.6%至20.41億元，可分派收入增逾21%至14.2億元，每單位分派0.6311元。

一大堆數字背後的要義是派息多咗，其實領匯自○五年十一月上市以來，派息不斷提高，年度平均增長率達雙位數字。即使預期下半年派息水平持平，今年的息率都達到4.27%，屬高息一族。領匯可分派收入優於市場預期，股價一度升至28.55元，收報28.25元，升近3.5%，創上市以來的歷史高位，走勢真係唔講得笑。

翻新商場提升價值

領匯來自零售物業的租金佔總收入比重接近75%，租金中逾半是飲食及超市食品行業，面向普羅大眾客戶群，屬消費必須類別，租戶穩定，防守力度高。○五年以來，領匯翻新了22個商場，大幅提升資產價值，令商場人流急增，租金回報上升，估計一三年時再有多十四個項目完成翻新，代表未來三年香港經濟形勢變化不明之下，翻新工程的滾動都可令旗下商場租金續有調升的空間。

市場盛傳領匯繼購入南豐廣場後，吼中觀塘麗港城商場，涉資多逾20億元。領匯管理層未有否認傳聞，但觀乎連同銀行可動用信貸在內的現金多達40億元，預估的資本開支有限，未來六至十二個月再進行收購的呼聲甚高，規模日益壯大，股價要挑戰30元亦不是天方夜譚。

古勝