孖妹缸湖遊:同80後經濟學家斟世界

孖妹翻開月曆,發現聽日就係「立冬」,即係話香港會步入寒冬,唔知股市又會唔會遭遇同樣境況?股市反映經濟,經濟又會影響股市,股市點發展無人知,咁不如從生活層面,睇吓香港嘅經濟狀況。今次孖妹約咗位新一代經濟學家,同大家講吓環球經濟狀況,希望從中找尋契機,預先幫散戶喺股市寒冬中「禦寒」。

孖妹上次睇財經節目,發現一位同祺祺一樣可愛嘅八十後經濟師。原來呢位係未來資產證券大中華區首席經濟學家楊婕,佢年紀輕輕就已修畢經濟博士學位,仲曾經喺IMF(國際貨幣基金組織)做過經濟學家,負責研究東歐危機國家嘅經濟,以及幫手制訂經濟改革政策。佢咁猛料,當然要即刻約佢出嚟Tea一Tea,聽聽新一代經濟學家嘅諗法,兼且用生活角度嚟分析近期嘅環球經濟形勢。

楊:未來資產證券大中華區首席經濟學家楊婕

高妹:你咁年輕就喺IMF做過嘢,成日要面對咁多高官猛人,人哋會唔會覺得你係細路女架?

楊:我入IMF嗰陣得廿七歲,難免會畀人有唔穩重嘅感覺。我仲記得有一次到烏克蘭出差,嗰時我負責宏觀經濟預測,要擔大旗預計當地嘅國內生產總值,再決定係咪派錢資助。哈哈,烏克蘭經濟局長初次見我,不禁以為IMF玩嘢,派個口靚妹嚟傾!不過當我哋正式埋牙工作,就會發現我確有真材實料,就會尊重我o架啦。其實,我覺得年輕亦有年輕嘅優勢,可以畀到不同嘅諗法意見嘛!

祺祺:我成日聽人話美國人洗腳唔抹腳,你喺美國生活咗咁耐,你覺得佢哋係咪經常爭人錢o架?

楊:無錯呀,佢哋使錢真係好誇張,就好似蘋果教主話齋「Live as if there is no tomorrow」,就連使錢都跟住!美國人借錢消費好普遍,你會見到佢哋借錢買屋買車,唔同中國人一定要儲到錢先會去買嘢。我阿媽以前畀十蚊零用錢,就教我要儲低五蚊,儲蓄觀念好濃厚。不過,諗深一層,都係同經濟政策有關,美國息口低,借錢又容易,咁咪係咁借囉,都係因為咁樣借法,先搞到次按危機以致雷曼爆煲,出現○八年金融海嘯!

高妹:又係嘅,但係新一代嘅中國人都開始使錢使得好犀利,會唔會步美國後塵架?

楊:現時無疑中國人係大使咗,但係我哋嘅傳統儲蓄觀念仍然存在,仲會量入為出,未有趨勢顯示中國會好似美國咁走入債務困境!

中國經濟明年料放緩

祺祺:中國經濟同我哋息息相關,咁你又點睇中國經濟發展呀?

楊:中國政府會持續調控經濟發展,出現軟着陸嘅情況。中國製造業採購經理人指數 (PMI) 往下跌,中國出口數據亦愈來愈差。歐美國家嘅經濟唔掂,其他新興國家都會受到拖累,中國自然難以獨善其身啦!仲有呀,中國對房地產嘅緊縮政策應該會持續,因為呢個市場實在太重要喇,唔好好控制就會好易出事,外國都有好多活生生嘅例子啦!不過,中國的內需情況仍然好好,我諗出年會有放緩迹象,但都要睇吓政府有冇支持經濟嘅政策。

高妹:咁香港經濟又會點呀?

楊:相對而言,香港經濟就更加受壓喇!香港係自由市場,對資金流向好敏感,再加上以金融業為主,又倚重出口,實會被歐美經濟拖累架。我八月嚟香港嗰時,覺得香港經濟好好,周圍都排長龍,好似去飲茶要等位,去買衫又人頭湧湧,但係依家呢啲情況好似少咗,就連我幫襯開嘅美容院都多咗優惠來吸引客人,藉此提升番個生意額。不過市民陸陸續續咁收到政府派發六千蚊,將有助刺激短期消費意欲。

祺祺:你喺IMF做同喺韓資機構工作,有咩唔同呀?

楊:以前喺IMF,需經常往來世界各地,睇嘅嘢較闊較廣,講嘅話題亦會較圍繞唔同國家嘅趣聞。依家喺私人公司,工作環境同文化都貼近番日常生活。我喺未來資產做咗三個月,覺得間公司都相當國際化,請咗好多唔同國家背景的人。我覺得咁係好事,可以喺開會時分享吓唔同睇法嘛,咁樣睇環球經濟都會清晰啲!

QE3出台亦難救美經濟

高妹:係呢,伯南克不斷放風話會採取行動刺激經濟,搞到個市場等QE3(第三輪量化寬鬆政策) 等咗幾個月,究竟出唔出架?

楊:聯儲局成日出口術架啦!我覺得QE3或者可以幫助吓個短期經濟嘅,但呢個只係假象,並唔能夠解決問題。之前嘅QE1同QE2對經濟嘅實質效用亦唔大,再推QE3嘅效用都只會比之前更弱。除非美國能改革經濟政策,從根本問題着手,否則將難以解決債務危機。

祺祺:嘩!咁樣講法,即係美國有排搞啦,仲要拖累埋香港添!既然股市係經濟嘅反映,不如你話畀我聽邊個地區嘅經濟前景會好啲,等我留意吓都好嘛!

楊:當唔少歐美國家都被債務問題困擾時,亞洲地區難免受牽連,經濟增長放緩,但其財務狀況都較為穩健呢!亞洲自經歷金融風暴後變得保守,將負債比率維持喺一個良好水平,所以你哋可以留意吓中國、印尼、印度等地區。

楊婕小檔案

18歲 入讀上海復旦大學法律系

19歲 轉修香港大學經濟金融學系,以一級榮譽學士畢業

22歲 修讀美國加州大學洛杉磯分校經濟學博士學位

27歲 任職國際貨幣基金組織經濟學家

31歲 返回香港,投身未來資產證券任大中華區首席經濟學家

明富環球爆煲,是否預示另一場金融海嘯即將席捲全球?

美國期貨經紀商明富環球申請破產保護,是歐債危機爆發以來首家爆煲的華爾街大行,市場擔心會出現如雷曼在○八年爆煲後的連鎖反應。你認為明富環球爆煲,是否預示另一場金融海嘯即將席捲全球?據今期《東方產經》網上民調,截至上周六晚上六時的結果顯示,61.2%表示「是」,38.8%表示「否」。

若有料報畀高妹同祺祺或有嘢問,可電郵money.biz@opg.com.hk

高妹、祺祺

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!