近兩個月香港有好多大型酒展盛事，絲絲去咗香港國際美酒展，見到首推紅酒貸款嘅永隆銀行都有擺檔，仲見到永隆銀行按揭及私人貸款中心主管蔡爾全（Robbin），佢話永隆係首間參展銀行，亦係今年唯一參展銀行，呢兩日識到唔少酒商，大有合作機會。
永隆今年起試推紅酒貸款，只接受指定50幾種紅酒，同埋客戶要向指定酒商買，紅酒先可以做抵押。永隆銀行助理總經理鄧耀樑（William）話，呢兩日擺攤位反應比預期好，會考慮接受更多紅酒種類同認可嘅酒商產品做抵押品。
近年紅酒投資成為唔少人目標，聽講好多內地客都心郁郁，原來永隆嘅紅酒貸款有一半客都係內地同胞，比例同香港客分庭抗禮，睇嚟內地紅酒投資都發展得好快，怪唔之得Robbin話紅酒貸款商機大，聽講佢哋今日繼續喺酒展開埋講座，教埋客戶投資紅酒，開拓客路。