前聯交所（港交所合併前）主席鄭維健（圖），話健康問題，尋日突然辭去中海油（00883）同瑞安房地產（00272）嘅獨立非執董職務，令絲絲突然為佢擔心，希望佢無咩大礙啦。
鄭維健家族以製衣起家，近年轉戰房地產投資，搞得有聲有色。不過，大家對鄭維健認識較深刻嘅，除咗因家族事業外，最主要係佢擔任唔少公職，為社會作出唔少貢獻，當中包括喺九九至○一年擔任中央政策組首席顧問，同出任大學教育資助委員會主席等。
絲絲最記得嘅係佢喺九四至九六年擔任聯交所主席期間嘅事，最重要嘅貢獻之一，相信絲絲講完後，持有港交所（00388）股份嘅經紀行老闆或者低位買入港交所股份嘅股民，都要多謝佢，事關佢擔任聯交所主席期間，佢聯同當時嘅行政總裁周文耀，提議將各交易所合併，以加強統一管理各交易所嘅風險管理。
雖然呢件事要之後先至做成，但已為其後交易所嘅成功合併奠下根基，而港交所喺上市後，股價升幅凌厲，不少股民都賺到笑。另外，佢喺聯交所主席任內，亦推出咗諸如期權等產品，令本港金融產品更豐富。